تأملات تجوال برقة – “انثروها قبل المطر في الهواء،لعلها تنبت في كل اتجاه روعة”

صباح الخير

بعد كل تجوال يكتب المتجولون آراءهم وانطباعاتهم عن التجوال، وما نسعى إليه أن نكتب بانتباه لعلاقتنا مع الكلمات المستخدمة ومعانيها، فنكون شركاء في تكوين المعنى، كما نشارك في شق طريقنا في الجبل، النصوص في الأسفل كتبها المتجولين بعد تجوال برقة، كان في التجوال 100 مشارك باستضافة محمد الخبير، تم زراعة أشجار الزيتون في ارض مهددة ما بين سبسطية وبرقة، قد تعكس هذه الكتابات لكم الروح التي كانت في التجوال.

فريق تجوال سفر


استمروا في روعتكم وانثروها قبل المطر في الهواء لعلها تنبت في كل اتجاه روعه من اقوال حسن كراجه تذكرتها يوم زرعنا الشجر – 
عبدالرحمن جادالله.

____________________________ 

نشاط زراعة الزيتون كان له دور كبير في تميز النهار بالنسبة لي المساهمة في زراعة شجرة كانت تجربة رائعة ما بقدر احكي عن الشعور هو كان مزيج من الفرح وشكل من اشكال الصمود والتصميم على الحق بالوجود على هذه الارض، واضافة اسماء القرى المهجرة بجانب كل شجرة كان مؤثر وقصر المسافة بينا وبين هذه القرى الي اليوم رجعنا احيناها، جمال الطبيعة و روح المجموعة زاد من جمال التجوال. – كاميليا سليمان.

____________________________

حسن اليوم زرعنا ١١٣ شجرة، كل رسالة منك يا اخوي بتوصيني نزرع بالتجوال شجرة.  حسن يخوي ، احنا اليوم ما زرعنا شجر بس ؛ احنا اليوم خطينا اول خطوة ل١١٣ قرية مهجرة سمّينا الشجرات بأسماءهن. يا اخوي كل حبة تراب بحشناها واحنا بنزرع بالشجرات حسيتها بتحكيلنا احنا مش ضعاف بقوة اروحنا وبحبنا لهاي الأرض وللوطن  مشينا يخوي بقرية برقة وبجبالها وغنينا الاغاني الي بتحب تغنيها وحاولنا ولو بشوي نسد مطرحك بالزفة واه صح نسيت احكيلك انو حسين شجاعية اليوم كان ضابط ايقاع التجوال ، بصراحة يا حسن هالشب بيرفع الراس زي كل شباب وصبايا تجوال اليوم ، كان معنا سعد ورامي اسيرين محررين نشالله العقبى الك. يا اخي نشالله بتطلع وبتشوف هالشباب وهالصبايا شو ارواحهم رائعة وارواحهم وحبهم للأرض عملت روح تجوال اليوم.
تجوال اليوم رجعني لروحي ورجع روحي الي – محمود عساف

 ____________________________

كل مره بطلع تجوال بشوف بوست سامر ,الي بالعادة ببلش , اكتب تأملات تجوال …. , بفتح مكان ما منكتب الكومنتات بصفن بالكيبورد و ما بلاقي اشي يعبر قديش بكون مبسوط و قديش بكون منكد بالباص و احنا مروحين , انتو ناس غيرتو اشياء كتير بحياتي , و يمكن ما ببالغ لما احكي انتو ناس بنيتو شخصيتي من جديد , شكراً الكم , و بنسبة لتجوال برقة حاسس حالي عم بكتشف الطبيعة الفلسطينية من جديد و بكتشف اديش المجتمع الفلسطيني مضياف و بحب الناس تيجي علي , برقة بلدة فلسطينية بتجنن و بتمنى ازورها كمان مرة و اشوف اهلها الطيبين الي طول الوقت مبتسمين بوجوهنا 🙂 شكرا لمستضيفين التجوال ع اليوم الرائع 🙂 – حازم القواسمي.

____________________________

التجوال فكرة بتكبر وبتتعمق فينا كل يوما أكثر وأكثر .. وكل ما تتعمق فينا هاي الفكرة بنرتبط بالأرض أكثر وبنرتبط ببعض أكثر .. لما بفكر بالتجوال بحب أفكر بكل التفاصيل حتى اللي بتكون مخفية ومش مبينة .. مثلا مبارح كنا 100 متجول موزعين جغرافيا بطريقة جميلة، كان في معنا متجولين من عرابة في شمال فلسطين المحتلة وضلك نازل باتجاه الجنوب حتى توصل أقصى جنوب الضفة .. ضل علينا نجيب ثلاث أو اربع متجولين من بير البسع وغزة علشان نغطي فلسطين التاريخية كلها .. روعة التجوال جاية من كل هاد التنوع.. أشخاص رائعين من كل فلسطين التاريخية بيزرعوا شجر زيتون في أراضي سبسطية وبرقة وكل شجرة باسم قرية مهجرة وبعدها بيتقاسموا أكلاتهم وبيفطروا كلهم مع بعض وبعدها طلعنا الجبل .. انا لو كنت لحالي بفكر ألف مرة قبل أطلع الجبل .. بس مع المتجولين الواحد بيطلع ولا بهمو .. روح المتجوليين الجماعية هي اللي دفشتنا لفوق على راس الجبل وبدون ما نحس بالتعب أو هو كان في شوية تعب بس جمال المنظر بستاهل.. فعلا الواحد بختبر المعنى الحقيقي بمقولة انها فلسطين جنة الله على الارض .. والمعلومات القيمة اللي قدملنا ايها مستضيفنا بتستاهل ودرس منير عن التعلم بالمشي والتجول بيستاهل .. وطنجرة المجدرة اللي طبخوها كاميليا وساندي بتستاهل .. وبدي أقلكهم انو هاي الطنجرة توزعت جغرافيا على ثلثين فلسطين التاريخية من الجليل حتى الخليل انتو عظيمين .. والمجدرة عظيمة واللي أكلوها ناس رائعين بكل ما تعنيه الكلمة وصمود أهل برقة ووقوفهم امام الاستيطان عظيم ويستحق الانحناء .. كان ممكن نقرأ عنه بس لما وقفنا في نفس المكان اللي صمدوا فيه هاد أعطى قيمة أعمق للمعلومة اللي أخذناها .. بعدها نزلنا زرنا بيت آل مسعود أو بالأحرى قصر/ سراي آل مسعود برضوا كان ممكن نقرأ عنه بس مش مثل ما نمشي فيه ونطلع على سطوحه ونشم ريحة 400 سنة هي عمر أقدم جزء في البيت ولا كان بامكانا نعيش بكرم ضيافتهم .. إلا من خلال التجول في القصر .. التجوال كان رائع لأنو أرواحكم رائعة دمتم متجولين – يحيى ناجي.

___________________________

برقة والتجوال والعمل التطوعي .. شو بدي احكي تأحكي عن هاليوم اللي قلب مزاجي شهر لقدام .. كثير اشياء جميلة كانت بهاليوم بس اجملها كان انو الكل اشتغل بزراعة الشجر الكل بدوا يزرع شجر قديش هاذ الموضوع بيزرع جواتنا انو الشباب مرتبطين بالارض وبحبوا الارض وبحبوا يخضروا بلدهم يعني الشجر والارض هاي كمان كم سنة رح تصير تثمر وتعطي خير لاهلها ورح نضلنا متذكرين انو احنا اللي غرسناها في ارضنا .. كل طلعة مع التجوال بحس قديش البلد جميلة ويمكن بكون رايحة المنطقة 20 مرة من قبل بس معكم بكتشف انها احلى واجمل واروع – سلوى حماد.

___________________________

!..كل تجوال بزيد تعلقي بالأرض .. شُكراً بحجم الكون سعادة لا توصف .. تجوال مميز فريق رائِع، اختيار مميز .فخورة بوجودي بينكم ،،،التجوال صار بدمي – سماح عرار

___________________________

من تجوال لتجوال.. مع كل لحظة بقضيها معكم … كل ضحكة… كل قصة… كل صورة… كل لمّة… بعرف قديش انا محظوظة اني عرفتكم وانتوا من أجمل الأشياء الي صارت بحياتي.بحبكم كتير كتير كتير كتير كتير ! شعور كتير صعب الكلمات تعبر عنه – مريم ريان.

___________________________

أنا هدا التجوال الاول الي معكم يا ريت عرفتكم قبل ناس بتعطي من قلبها يعطيكم العافية فردا فردا تقيمي والي شفته وعشته اليوم بقدر اختصره بكلمة انا (معكم) الله يقدرني 🙂 نفتخر بكم – مهند نيروخ

___________________________

من وين ابلش ولا من وين!!!  كلشي كان مميز اليوم واكتر من رائع…. متجولين كالعادة اقل ما بنحكا عنهم رائعين ومبدعين…. برنامج مميز للتجوال اليوم بزراعة الزيتون انبسطنا كتير كتير وحسينا حالنا كتير قريبين من الارض والشجر وتجربة مميزة جدا وياريت بكل تجوال يكون في مساعدة بزراعة او اي شي .. بعدها طلعنا الجبل بأجواء كتيير حلوه وهوا منعش ..وكتيير انبسطنا وابهرنا بالاطلاله المميزه للجبل والطبيعة الخلاااابه … وبعدها انبهرنا بجمال القصر وبنشكر اصحابه ع ااضيافه الحلوه.. وانبسطنا بالاسيرين المحررين وحكايا السجن منهم…  رائع رائع تجواال برقة وتجوال سفر عشق لا ينتهي وكل الموودة والحب والحنان والابتسامه المميزة 🙂 – حسن ابو سلعوم.

___________________________ 

تجوال اليوم غمرني بمشاعر عميقة بتجنن مش قادرة الاقي كلمات تعبر عنها… المكان رائع والصحبة طيبة  كلكم بتجننوا، وبحبكم كلكم قد ما بحب الزيتون ❤ وحسين أحلى قائد مجموعة 🙂 – جمانة جبريل

___________________________

تجوال اليوم كان أحلى تجوال على الإطلاق بالرغم اني ما طلعت بباص الخليل الصبح عشان ما فيه وساع بس ما تركت أحبابي وجيت بمواصلات من الخليل لبرقة على 3 مراحل أتحدى الصعاب من أجل التجول في أرضنا العزيزة كانت الطبيعة خلابة وفوق التصور؛ بالفعل فلسطين جنة الله على الأرض ورفقة ولا أروع ومتجولين خرافيين – نور الدين كركي.

___________________________

رح ضيف تأملي لاني ما رحت عالتجوال : شعور بالغيرة شعور بأني اليكم انتمي .. كنت حابب ازرع معكم – واتعرف اكثر على حبيبتي اعرف اكثر ملامحها الشمالية … واتعرف على اهلها في برقة … وغني معكم ونزف زي ما علمنا حسن الله يفك اسره … حب الارض وغنيها بتغنيها بتغنيها … واحلى ارض بكل الارض الارض الي بنمشي فيها  مساك بالخير واحنا توينا جينا  تنزهزه القلب ونروح لاهالينا ولولا المحبة ع القدامة ما جينا  لا دهسنا اراضيكم بريجلينا – احمد سبسوب.

___________________________

Categories: تأملات | Leave a comment

Post navigation

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Create a free website or blog at WordPress.com.

%d bloggers like this: