تأملات تجوال تل… “التجوال هو طريقتنا الجميلة في السفر، في الحب وفي الحياة”

10297554_764459643564173_2545422670669234410_n

كل ما بنطلع جبل، بنشوف البحر، قديش الحدود الي براسنا وهمية!

كل مرة بنطلع جبل، بنكسر صورة خلقوها براسنا عن الوطن
انه بعيد، صعب، ممنوع، كله حجار وسيارات وبنايات وضجة وناس وحواجز أو اراضي بعيدة فاضية بتخوف مستطونين تطلعش ع الجبل تقربش من السياج تقربش من النقطة … كل هاي الصور بتتكسر، وبتيجي محلها صورة الوطن الي مليان حياة وحرية، ريحة الأرض، صوت الختيارة، أغانينا الشعبية، أراضينا الحلوة، روح التحدي، القوة والطاقة الايجابية

شكراً للمتجولين فرداً فرداً
تجوال سفر، تجوّل في الأرض تمتلكها

________________________

تل … اي نعم مكان اسمو مكون من حرفين …. بس الخضار يلي فيه اكبر من اسمها بكتييييييييير….. النبعات .. والمية … وبراد المية … ونعمة المية …. يا ويلي شو حلوين وشو بريحو النفسية ….. وتنسوش انتو! اه انتو شباب وصبايا التجوال ….. بدونكم كلمة تجوال سفر ما بتكمل … والحب والحنان والالتزام ما بكمل…. منطقة العامود…. التحدي الكبير …. يعني بصراحة لمة حكو بدنا نطلع … انبسطنا …. وبنص الطريق انحرقنا …. ولمة شفنا وين العواميد بالزبط … انذهلنا … بس بطموحنا وصلنا …. وطلعنا … وارتحنا …. حتى انه لو شفتو المنظر شو رائع …. والارتفاع شو شاهق …. بس وحياتكم انسلقنا …. ومتل الجاج المسلوق تحولنا …. بس مع روحنا الحلوة وقوتنا سوا كملنا … والعيون التانية والاراضي التانية مشينا واستمتعنا … حتى الغناني فرفحتنا … وبعدين مع مرت الشهيد قعدنا وسمعنا… حتى امها يلي تركت كلشي وقررت تترك بلاد برا وتيجي لعنا تتهنى …. ومثل ما قالت مثل هالارض ولا يمكن بحياتنا نلاقي ….
ومشينا ومشينا لاخر محطة وقعدنا … بين الوردات والميات بوردنا …. وتبادلنا تحت الشجرة وفيتها …. وغنينا وانبسطنا …. ومن كتر التعب توحدنا مع الخضرا والفيات … وروحنا …. وحب وحنان والتزام وزعنا …
– أصالة الزاغة
______________________________

تجوااااال حلو ورائع …وعلى قول بعض الاشخاص (كان متعب جدا) صح متعب بس الي بجرب اصعب من هيك طلعات وهيك جبال بحكي عنه ولا شي …. وللامانة انحرقنا ….لونين بس برونزاج طبيعي….يسعدكم كلكم بحبكم يا احلى مجموعه ولو التجوااااال مش حلو كان هاي مش المشاركة السادسة على التوالي
– ميادة عليان
_______________________________

وكما قال درويش يوماً فالطريق هو الطريقة، وتجوال هو طريقتنا الجميلة في السفر، في الحب وفي الحياة… صار الطريق كذلك بكم ومعكم. صارت الحجارة بحراً والريح موج يهدر من كل الجهات، والأغاني عصافير في المدى وللمدى، واللكنات واللهجات قرى ومدن تصطف من حولنا لتعيد دائرة الزمان لأوله، هكذا خلقنا وطناً بين الخطى، علمَّنا أرجلنا المشي لئلا تطول عودتنا لبلادنا، وعودَّننا قلبنا على الحب.
– فادي عاصلة
______________________________

التجوال ’ من انسب الاشياء التي قد تعرفك على اخوان واصدقاء ومحبين جدد ’ ومن كل المدت الفلسطينية ’ ومن خلال هذا التجوال ’ تضع بصمتك على جميع الاراضي التي نمتلكها ’ فكنا لم نفكر ان نزور هذه المناطق والجبال التي عرفناها لاول مرة ’ ولكن بهذا التجوال تتعرف على اشياء جدا رائعة واناس جدا طيبون ’ شكرا لصاحب هذه الفكرة ولمنسقين هذا التجوال ’ ولجميع المشاركين بهذه الفعاليات ’ انتم اشخاص زرعتم فينا حب التشوق اكثر لهذه الارض ’ انتم رائعون , شكرا لكم
– احمد النتشة
______________________________

رغم كل شيء ومع كل شيء ، يبقى التجوال سر الحياة !
رغم التعب والشمس والمشي كثير كثير كثير كثير ، بس حلاوة الروح اللي بالتجوال كانت معطيتنا طاقة يمكن نكمل كمان ٥ كيلو متر مشي ، بس لولا رحمة الله !!!
دايما بس اروح بفكر شو ضافلي هالتجوال ، وشو اخذت معلومات و قصص منه ..يمكن هالتجوال اقل تجوال اخدنا معلومات بس اكثر تجوال كان فيه طاقة وحب ومرح ،، ضافلي ايجابية ل وقتي القريب مبدئيا ما كنت اتخيلها
نكت فادي عاصلة وروحه الجميلة جدا..
ابطال الملاعب وعز غيث بباص العاصمة..
روح العائلة المحبة اللي ما شتتتها الحواجز والجدران
هاي اشيا ما بتلاقيها الا بالتجوال :))
– ملك عثمان
______________________________
على الرغم من كل المشي والشمس والتعب الا انو الواحد لما يجي يروح بكون نفسو يعيد اليوم من اول وجديد
تجوال اكثر من رائع وكلي شوق للقياكم في التجوال القادم
يعطيكم العافية على جهودكم الجبارة
بحبكم كلكم اصدقائي. نراكم قريبا
– سيف شريف
_____________________________

قد يكون هذا التجوال الأقل حظا من حيث المعرفة الحقيقية للبلد وأهلها، عاداتهم، قصصهم، ولكن لا تزال روح التجوال تطغى على كل شيء..
التجوال أثبتلي انه الدنيا زي ما بتفرق بترجع بتجمع، ناس بعرفهم من زمان كنت بحب ألتقي فيهم بس ما كان في فرصة، رجعت ألتقي فيهم من جديد، وناس جداد دخلوا حياتي قلبولي اياها فرح وحب وتمنيت لو بعرفهم من زمان ..
يا الله ما أروع التجوال، ما أحلاكم كلكم شو بحبكم..
– جمانة جبريل
_____________________________

كل الشباب الي كانوا معنا من اهل البلد شكرا كتير الكم … و شكرا على المبادرة و الاستضافة الى واحدة من اجمل قرى مدينة نابلس
اكتشفنا قديش التنسيق للتجوال صعب …و قديش باخد وقت و جهد ….فيعطيكم العافية جميعا من الالف الى الياء..
قعدتنا مع ابو نسيم في المحددة اعطتنا نظرة انو لسه في ناس في قرى نابلس بشتغلوا بالزراعة و بربوا مواشي و بقر منشان ينتيجوا و يعملوا اكتفاء داخلي من منتوج الارض…. اسمعنا منو كيف بينزلوا على المدينة يبيعوا منتجاتهم من البان و مشتقاته على الحمير…و احنا بصراحة في نابلس قبل ما نشتري اللبن بنسال اذا تلاوي او لا !!!! لانو معروف بجودة
حكاية الشهيد الي اسمعناها من زوجتو كانت ماثرة
عيون المي…. و الحروب المائية … رشاشات المي الي ما بعرف مع اي باص روحوا… بس مش مشكلة خلوهم لحروب مائية قادمة هذا الصيف…
كاسة الشاي على الحطب الي كنا نتاخر منشانها عن المجموعة كانت من اروع ما يكون
منظر الساحل الفلسطيني المحتل وقت الغروب لما روحنا كان اكثر من رائع كلنا تمنينا نكون هناك و شوفنا قديش البحر قريب علينا و ختمناهنا بقعدة في قهوة الهموز الي غنت فيها ام كلثوم مع جزء من باص الخليل كانت جميلة ..
وجودكم معنا خلى التجوال اجمل
ملاحظة احنا باخر لحظة اختصرنا كمان ساعة ونص مشي
نراكم في تجوال قادم
– هبة يوسف
______________________________

مبارح كان اكثر من تجوال بالنسبة لالي … كان مغامرة بكل معنى الكلمة
برغم الاصابة حاولت باقصى الجهود اني اتجهز للتجوال واتحديت كل الاراء اني ما رح اقدر
برغم المخاطرة الي عملتها وقديش كان المشي صعب بالبداية وبالذات بالمسار الاول وطلوع الجبل وبمرحلة معينة كنت رح انهار وما اقدر اكمل
بس في سر في التجوال في سر بالناس الموجودة والروح الموجودة
تعدى التجوال مرحلة التعرف على البلد والارتباط فيها … التجوال صار ظاهرة مجتمعية ونسيج وطني ومثل ما قال سامر “علاج نفسي” وانا بضيف انو علاج جسدي بعد تجربة
برغم الارهاق الا اني سعيدة جدا وحاسة بالرضا الذاتي بعد مشاركتي
شكرا لكل الي ساعدني مبارح بالذات ل سامر شريف.. محمود عساف.. ملاك عثمان..ممنونة الكو
شكرا لباص القدس الرائع ولروح العاصمة الي احييتوها
من قلب بيت صفافا – عاصمة العاصمة لمستم شغاف القلب
– دعاء صبحي
______________________________

مبارح كان مختلف بكل شي يتعلق بالتجوال ، باص من العاصمة لمكان التجوال ، روح التجوال الرائعه و اهل فلسطين الاوفياء ، مبارح حاولت ما امسك كاميرا او جوال و بس استمتع بلحظات التجوال و طبيعه المكان ، شفت اصدقاء من سنوات ما التقتهم تعرفت على ابن عم جديد ، فرقه الفنون الشعبيه الصفافيه كل شي كان مميز ، حتى التعب كان جميل و في لذه ضحكنا كتير واكشتفنا بحالنا الطفوله المفقوده رائعين يا فريق تجوال كلكم بلا استثناء و اهم شي كلمة السر
ابطاااال الملااااعب
– عز غيث
_______________________________

output_gNiP0O

Categories: تأملات | 1 Comment

Post navigation

One thought on “تأملات تجوال تل… “التجوال هو طريقتنا الجميلة في السفر، في الحب وفي الحياة”

  1. khader nijim

    فلسطين القدس بأرض كنعان مابين نهردجله والنيل *
    تجوال سفر جولات اعرف ارضك بتعرف وطنك بتحرر شعبك
    ثقافه وعونه بلا حدود *

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Blog at WordPress.com.

%d bloggers like this: