تأملات المتجولة أصالة الزاغة . في تجوال الأردن الثاني

صالة الزاغة

محاولات في الكتابة كثيرة لا متناهية ولن تنتهي من منا لم يحلم يوما بأن يكون في جنة على الارض ونحن نتمناها في الاخرة دوما!!! فماذا لو قلت لكم بأني كنت في جنة على الارض رائعة وغير متناهية الجمال خيالية لا منطقية اتحسر على السنوات التي مضت ولم ارى مثل هذه الاماكن الخلابة… مناظر من رهبتها ينقطع نفس وتصمت كثيرا وتتأمل حرقة في القلب تنزل دمعتك بكل الأسى والحب والارتباط تنغمس في كل جزء تراه

ابتدأت رحلتنا بالحواجز والتعب والنكد المعتاد الا اننا قلبنا هذه التجربة لضحكات وهمسات وابتسامات وتحديات لكل ما هو مؤلم وسهرنا وتحدثنا وحاولنا الاستعداد لهذا المسار الخيالي واذ بنا في اليوم التالي نذهب للركوب في الباص اه باص الرحلة الفصعون يلي بوسع الف بني ادم عند قلب زي قلوبنا استنينا بعض يلي نايم ويلي مش نايم ويلي جاي معجوء ويلي جاي متوتر ويلي بعرف الكل ويلي ما بعرف الا حدا واحد ملزء فيه وهيييك وصرنا نتعرف على الشوفير يلي طلع اصلا فلسطيني ومن جنين وبعدين الفكر الجهنمي كيف نرتب هالشناتي يا الله .

وتيسرت وانطلقنا واحنا متلهفين ناخد النصف الاخر من الجسر الغابر وفعلا اكتمل العدد وزي المجانين حبينا بعض وانطلقنا على المغامرة الاولى وصلنا لاول قطعة من الجنة ومناقشات وحوارات وترددات وخوف وحب وحماس وسلطة مشاعر تركيبة رهيبة وانقسمنا نصفين وبلشنا ولا هو جبل زي اي جبل بدنا ننزله بس هالجبل بأخره تحت في مي ارتفاعها اهبل بسيط بس بالاخر طلعت مش مزحة وطلع وادي ومي وارتفاع من 3 ل 10 متر وبلشت رحلة المغامرة والتعرف على بعض اكتر تقوت علاقتنا ببعض بس من هاد المسار لانه كنا كلنا منساعد بعض الثقة ببعض كانت عمياء الواحد فينا متاكد ازا وقع او زحلق في 10 حواليه يمسكوووه ازا الواحد خايف ومتردد ومرتعب في 20 واحد ووحدة يمسكوه ويشجعووه وبهالمسار كانت الدنيا مش هي الدنيا والناس مش همة الناس والمي والجبال والسما والطحالب والصخر والحب والخوف والتحدي كان اكبر من كلشي ومشينا وسبحنا واتزحلقنا ويا ويلي شو كان اروع من الروعة .

وخلصنا وغيرنا وبلشت رحلتنا الطويلة كتير للمخيم في راسون احلى واصعب ساعة وتلت بحياتنا يلي بالاخر تحولت لقرابة ال 5 ساعات وصلنا عالمخيم الدنيا نص ليل وقال الزرب بستنى فينا وزي المفاجيع ولا حدا فينا مخو شغال تعبانين وجوعانين ومعفنين من الطحالب والمي واكلنا وتعرفنا على بعض وتوزعنا على الخيم وحاولنا نسال ازا في مي نتحمم وللاسف ما كان في اه اه عادي نمنا مغفنين المهم والاحلى من كل هالشي انه نمنا متاخرين طبعا لانه كان في ظاهرة شهب ما بتصير كتير وقال شو حاولنا نشوف الشهب واحلى شي انه ما حدا فينا من كتر التعب عرف يسهر منيح لحتى يشوفهم.. احلى نهفة اول شهب شفتو تمنيت لو فيه بطيخة اكلها هلا هلا وما تحملنا التعب وغفينا… وصحينا تاني يوم ع 8 زي القرود نص عيون مفتحين اكشفنا جمال المكان يلي احنا فيه مجموعة تحضر فطور ومجموعة بتصحي النايمين ومجموعة حاولت تتحمم بنقط المي يلي بتحاول تنزل برغم برودتها، وانطلق اليوم التاني ورحنا على مسار راسون والمتحف يلي براسون ومصنع الصابون والبسكوت وبعدين عالغدا سريعا عند عمو نسيت اسمو بس بيتو بسطل .وزفينا واكلنا وضحكنا وانبسطتنا وارتحنا وبعدين سريعا جدا جدا على قلعة عجلون وانغمسنا غمس بكل هالجمال والعراقة والقدم وخلصت القلعة وكان وقت انه نرجع على المخيم على جلسة تغميس يلي كانت عبارة عن قلوب صافية بتحكي بدون عقل يحقد او يفكر او اي شي والاحلى من كل هاد انه صحابنا يلي من تغميس الاردن مستعجلين يروحو عشان يشوفو دينا يا الله مين دينا كلنا منسال اي والله حبيناها قبل ما نشوفها قد ما كنا متلهفين عليها وفعلا وصلنا وشفنا دينا وزوج دينا وصاحبة دينا طلعو ناس من الجنة جايين يزورونا في الجنة تاعتنا وقعدنا وحكينا وبكينا وضحكنا وتبادلنا افكار وخبرات وكانت ليلة من العمر ليلة كلها صفاء قلوب الكل بحكي بدون ما يحسبها انغمسنا غمس ببعض لدرجة انه صرنا جزء واحد روح وحدة بجسدين او بالاحرى روح وحدة ب 37 جسد اخخخخ ما احلانا وبلشت المغامرة التالتة وبلشت بأحلى سهر بعيد ميلادي يلي بكيت فيه عن كل السنة وحبيت فيه عن كل الدنيا وحسيت فيه انه الي ناس بتحبني مش عشان اشي واحتفلنا وانبسطتنا وانطلقنا الصبح بعد الفطور والتنظيف على مسارنا الحلو مسار ام قيس الخيالية بكل اثاراتها وبكل وجعها لانه شفنا الحدود وطبريا يا ويلي عليكي يا طبريا والجولان اخخخخ عايامك يا سوريا ولكم والله ببكي وانا بكتب وانزوينا وانغمسنا بالطبيعة يلي بام قيس

ومن ام قيس سريعا جدا على جرش قبل ما تسكر لتبدا رحلة البحث عن الكنز يلي بجرش وصبرنا حالنا بمعجنا وتجولنا في جرش بحثا عن الكنز وكيفنا وانبسطنا كتير وبعد ما قلعونا الشرطة السياحية لانه صارت الساعة 7 وانتهت مواعيد الزيارة طلعنا وودعنا احلى قلبين ميس وبلال زفيناهم وحبيناهم وحاولنا نخطفهم بس ما زبط ورجعنا على المخيم قلوبنا مشتاقة لبلال وميس وبنفس الوقت قلوبنا متعلقة ببعض بشكل رهيب واستعدينا للعشا الفاخر والشوي والنش والسلطات وكلشي كلشي كان فخم ورائع ولو شفتونا زي خلية النحل يلي بحضر ويلي برتاح ويلي بساعد ويلي بتخوت ويلي بتحمم ولييييخة وقايمة وقعدنا واكلنا وكيفنا على بعض وقررنا نسهر سوا ونكشف عن اصدقائنا السريين وفعلا سهرنا وعملناها وكانت لحظات رائعة تعرف مين الانسان يلي كاين يدلل فيك ويدير بالو عليك وانت نفسك تعرفو بس عشان تشكرو وتواجهنا وحبينا بعض وبعدين حششنا لدرجة انه بطلنا عارفين على شو منضحك وعز كان ملك القعدة هو ونيروخ جد فرحتو قلبنا وحوالين النار قعدنا وانبسطتنا واتدفينا ومجموعة قررت اتضل صاحية تشوف الشروق وفعلا شفنا الشروق وعملنا مقالب بايخة بالنايمين وودعنا احمد وجهزنا حالنا لاخر مسار وحضرنا كلشي وعملنا انزال جبلي وكان شعور فاخر على الاخر وخوف ورعب بس تحدي قوي وخضناه وكلو سوا بحبنا لبعض وبعدين تصاحبنا مع النسر الرائع وقال تصورنا معه وانطلقنا من المخيم مودعين بيتنا في الجنة ذاهبين لارض الواقع متجهين الى السلط ويا ويلي على السلط مكان خرافي بصراحة شبيه جدا بمدينتي نابلس ليست عنصرية اما احاسيس جياشة ومن السلط اكلنا في مضافة الخليلي وعملنا عرس سلطي فلسطيني وشفنا لبس العرسان وباركنا لحسين ورهام وكان شي رائع مش عارفة شو بدي احكي اكتر من هيك لانه عندي كتير حكي ممكن اكتب تقارير عن كل منطقة وكل تفصيلة ومن المضافة بلشنا نودع بعض والدموع وحرقة القلب تزيد وكانه حدا بطول قلوبنا من محلها وبحكيلنا يلا روحو واح عالنهاية يلي مش نهاية وانما بداية لكل تغميسة تجوال حلوة منحبكم موووت اسفة بس هاد التأمل الوحيد يلي طلع معي لحدا هلا وفي تكملة اطول من كل هالحكي حب وحنان والتزام وتغميسة حلوة

بحبكم … للحديث بقايا كثير

من تأملات تجوال الاردن الثاني
المتجولة اصالة الزاغه

المزيد من تأملات المتجولين …

10426720_252928714909871_4094519590194481823_n (1)

إطلالة المتجولين على بحيرة طبريا وطبريا .. والجولان السوري المحتل .. من قرية أم قيس -تصوير فادي عميرة

Categories: تأملات | Leave a comment

Post navigation

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Blog at WordPress.com.

%d bloggers like this: