تأملات تجوال الأردن الثاني : وادي الهيدان وراسون أم قيس جرش عجلون السلط

تجوال الاردن الثاني من 23 الي 26\5\2014
شارك بهذا التجوال قرابة ال35 شخص من فلسطين والاردن وبمشاركة اصدقاء من مصر ولبنان.
تضمن التجوال مسار ومغامرة مائيه في وادي الهيدان وشمل مسارات في راسون وام قيس وعجلون وجرش بالاضافة الى السلط.
كان التجوال بأستضافة مجموعة تغميس

10154429_252928614909881_8400340840790361352_n

مجموعة تجوال سفر في قرية أم قيس في الأردن تطل على طبريا وبحيرة طبريا وجزء من الجولان السوري المحتل على يمين الصورة. – تصوير فادي عميرة

نؤمن بأن الوطن العربي وحدة واحدة، والحدود بين المدن العربية تهدف للسيطرة على الشعوب من مبدأ فرّق تسد. حلمنا في تجوال سفر هو التجوّل في المدن الفلسطينية التي لا نستطيع الوصول إليها حالياً بسبب الاحتلال،
والتجوّل في مختلف مدن وقرى وخرب الوطن العربي
تجوال سفر
________________________________

لن أخفي حماسي الممزوج ببعض المخاوف عند رؤية إعلان تجوال الأردن، خاصة أنه هناك مسار مائي حسب المعلومات المرفقة وانا ما بعرف أسبح وعنجد ممكن أغرق بشبر مي، بس حاولت قدر الإمكان طرد الأفكار السلبية التي راودتني، حتى أستطيع خوض التجربة.. بقدر أحكي اني فخورة في نفسي لأني اجتزت المسار، على الرغم اني جننت كل اللي حوالي، بس عنجد ما حسيت للحظة اني ممكن أكون لحالي، الكل كان متأهب لإنقاذي
وادي الهيدان قوى عزيمتي وإصراري، خلاني أتحدى مخاوفي، تأكدت انه الانسان مش لازم يظل يحكي ما بعرف أو ما بقدر، لازم يحاول ويعيش التجربة عشان يثبت لنفسه قبل غيره انه ما في شي مستحيل..
فيما يخص التجوال بشكل عام، التجوال كان استثنائي، كان خيالي، كنت متوقعة أنبسط وأتعلم أشياء جديدة، بس حقيقة التجوال فاق توقعاتي كمان..
تجوالنا في أم قيس المطلة على بحيرة طبريا، والمنطقة اللي كنا فيها عند التقاء الحدود السورية والفلسطينية والأردنية، أعطاني إحساس قديش الحدود سخيفة، واستحضرتني جملة صديقي سامر شريف ” انه الحدود وضعت للسيطرة على الشعوب من مبدأ فرق تسد، وانه الوطن العربي هو وحدة واحدة “، وفعلا اقتنعت فيها، وأي حد بسألني شو دخل الأردن بالتجوال بجاوبه نفس الجواب..
وأكيد فش تجوال بلا روح، قد ما نحكي عن الأرض اللي بنتجول فيها، وقديش هي جميلة، بس بدون روح مش راح تكون هالقد جميلة، والروح هاي انتوا.. انتوا الحياة الحقيقية والواقع اللي بنعيشه، انتوا اللي بصحى كل يوم لسه بدور عليكم، كل واحد فيكم كان اله بصمته وبوجوده اكتملت المجموعة.. بحبكم بصدق بعيدا عن أي مجاملة أو تكليف.. بحبكم كثير
– جمانة جبريل
____________________________

.هذا التجوال كان اكثر من اشتثنائي…. المغامرات يلي خضناها بوادي الهيدان ولا مغامراتنا في المخيم… ولا سهرتنا مع تغميس…. ولا دمعة اي حدا فينا لمة رهف عبرت عن كل مشاعرها…. ولا مقالبنا ببعض والكل نايم… ولا التحدي انه انضل صاحيين مع كل التعب والارهاق عشان نقعد مع بعض اطول فترة ممكنة…. ولا صحوتنا عالشروق يلي كانت قمة في الروعة والارهاق… ولا شكلنا واحنا زي الجيش منحضر عشا او فطووور …. ولا قعداتنا بالباص لمدة طويلة ومرهقة ومع هيك خلينا كل لحظة في الباص ممتعة…. ولا رقصاتنا عطراف الشارع… البطريق والزفة …. ولا اعادة استخدام المطربانات عشان يكونو كاساتنا…. اي والله اشتقتلو لمطرباني…. ولا مجاورتنا لاخوتنا من الاردن يلي اصلهم فلسطيني او سلطي او سوري او اردني بحت…. تعلمنا كتير قصص… كسرنا كل حواجز الخوف والرهبة.. كنا معتمدين عبعض بشكل بخوف لدرجة انه ازا واحد فينا غفي بدون غطى 10 بيجو بحطو عليه حرامات… او ازا حدا تعب 10 بصيرو بدهم يعطو محارم او مي او دوا او اية شي…. ولا لمة كنا بالمسارات الصعبة ولا يمكن نخاف لانه متاكدين تماما انه فيه كمان عشرة متبعين ورانا بلا ما نوقع او نزحلق….. غناني جمانة… ولا تعليمات سامر… او حتى تعليمات اي حدا فينا كنا نلتزم فيها بدون ما نتذمر… ما تعبنا لانه كلنا كنا واحد…. تعرفنا عكتيييير امور…. دموعنا باي لحظة وبالاخص بام قيس عالحدود الثلاثية كانت ربع ساعة من الخيال…. كيف قدرنا ناخد اذن نفوت عالحدود ونستمتع بالمنظر… وننغمس بالمشاعر ونشوووف قديه سخييفة الحدود… لولا السياسة ولا والله كان نزلناها كزدرة عطبريا وعالجولان السوري….. يااااا الاهي شو صعبة بس بتعطي امل وروح انه يلي اجى من ربنا مترابط عشرين دولة نا بتقسمو…. احنا كنا مع سوريين وفلسطيينين ولبنانيين ومصريين وما حسينا انه احنا مختلفين ولا للحظة…. الاثارات يلي ﻻحنا عليها بتحكي لغة وحدة…. تجولنا وامتلكنا الارض…. وحنضل هيك لنربط العالم لكو ببعض…. لانه احنا تجوال سفر… واحنا تغميس… واحنا ولاد وطن واحد…. وانا بحبكم وبعشقكم كتييير …. ويلي ما بحاول يفهمكم بخسر كتيييير ….شكرا بحجم الارض والكون والسماء..
-أصالة الزاغة

المزيد من تأملات أصالة الزاغة في تجوال الأردن
____________________________

تجوال الاردن ببساطة كانت لحظات من البحث واكتشاف الذات والتصالح مع النفس
أربع ايام مرت كالحلم كل الاشياء الجميلة الي ممكن تصير صارت معنا: السعادة الفرح الحب الاكل الرياضة المودة الصداقة الامل التعاون المساعدة الامان
بس بحكي انو الله يطعم هالتجوال لكل مشتهي
لانها تجربة كفيلة انها تهذب الروح وتبني الانسان وتحييه

من اكثر اللحظات الي اثرت فيي لما كنا بام قيس وطلينا عطبريا كنت انا ويامن لاجيء من مخيم اليرموك من قرية كفر سبت قضاء طبريا
قعدنا عشر دقايق من الحزن والغضب في البداية وحولناها لامل كبير رما بلشنا نتخيل كيف لو احنا هلأ عالطرف التاني من طبريا ويامن هلا بستقبلنا عنو ببلده وبنلاقيه بيسبح بالبحيرة ونقرر نروح عحيفا نتغدى
بالرغم اني شعرت بالذنب انو ليش انا بعرف طبريا منيح وانا من القدس اكثر من يامن الي المفروض يكون هو هناك
بس مجرد تخيل حياتنا بدون احتلال زرعت جواتي امل كبير وحكيت ليامن شايف العشر دقايق هدول قدام طبريا هاي هي فلسطين بالنسبة الي
مجرد انو الوطن كان حاضر في كل لحظة في التجوال معناها احنا على الصراط المستقيم هيك بلخص تجوالي
دعاء صبحي
________________________________

بعد تخرجي من الاردن ولفترة مش بعيدة ، كنت بشوف الاردن بيتي الثاني ، اللي فيه حياتي اللي مع الاصحاب والشلة والناس ،، اللي فيه بنسهر للصبح وبنطلع وما بنخلي لا كافيه ولا مول يعتب علينا ،، كنت احب جو الاردن كثير واتمنى لو عنا بفلسطين الناس ما بتنام زي بالاردن!!
بعد ما تعرفت عليكم و ع مجموعة تجوال سفر وطلعاتنا وتجوالتنا ،، اكتشفت انه الطلعات هي مش كافيهات ومولات ،، الانبساط هي مش ارجيلة ع كافيه بطُل ع شارع ،، صرت احس انه اي طلعة ما بستفيد منها وبستكشف اشيا جديدة فيها هي مش طلعة وما بحب اروحها ،،
وبس عرفت عن تجوال وبالاردن ،، اول اشي خطرلي انه كيف بدي ارجع ع الاردن بس بفكرة ثانية عن الانبساط ، وابطل اشوف ( قلوب حب ) بتطلع من اي كافيه بمر من جنبه يجبرني افوته
تجوال الاردن ،اول ما وصلت البيت بعد التجوال ،، اول اشي حسيت فيه بعد الحمام انه انا ب اوتيل ٧ نجوم ،، حمام قريب عالغرفة ،، مي قوية و سخنة ،، تخت و غرفة ،، واول اشي حكيته ينعن ابو الرفاهية من غيركم ،،،
كل ما حد يسالني عن التجوال ،، اول اشي بحس فيه ، انه حلقي صار يوجع وبدي ابكي ،، يمكن لانهن اربع ايام مش راح يتكررن بالحياة ، او لانه هالتجربة صعب انك تشرحها ل حدا بكل المشاعر والاحاسيس اللي فيها ،، ما بعرف ، بس من حد ما روحت لهالوقت ما حكيت لحدا عن اشي ، جوابي دايما اخخخخ عالاردن فش احلى منها !
التقاءنا ب ناس خلال اربع ايام صاروا هالقد عزيزين وهالقد لما نحكي عنهم عيوننا بزغللن حب واشتياق ،،
الاماكن اللي رحناها ،، اللي كانت اول مرة بفوتها معكم ،، كانت من احلى الاشيا بالحياة ، كنت لو شوي احس حالي بالجنة ، انه كل هالحب والجمال بالمكان والناس ،، شو ضل ؟!
اكثر مكان أثّر في ، لما وقفنا عالمطلة ع طبريا ، عالحدود الاردنية السورية الفلسطينية ،، كل مرة بروح عالحدود بنغص قلبي ، بس هالمرة كانت غير ،، اول اشي خطرلي لو ( يامن)  الشب الفلسطيني حامل الجواز الجزائري الساكن ب سوريا وبشتغل بالاردن ،، تخيلت لو النكبة ما صارت ، كان هو بسبح في طبريا يمكن ،، او فاتح مطعم سمك ع شط يافا او حيفا ،، كان هاي الحدود الوهمية هي مش حلم ،، 
اجتماعنا عالفطور والغدا والعشا ،، هاي الاشيا اللي نادرا ما تصير ب عيلتي انا ،، صارت معكم ،، تحضير الشاي والفطور وضب الطاولة ،، اللي نادرا ما ابادر فيها انا ،، بادرت فيها معكم ،
الصديق السري ،، اللي كان من احلى الاشيا بالتجوال ( بغض النظر انه محمود عساف من احلى واحسن مخلوقات الله ) ،، عسااااف انا لو كنت بعرف انك صديقي السري كنت صليت ل الله ركعتين شكر وما طلبت منك اشي ،،
ضِحكنا واحنا ع النار ،، نكت عز ب اخر الليل و بالباص ،، رقصة البطريق بنص الشارع ،، ضيعان مهند وطيبة قلبه حبيب القلب ، لهجة دعاء ( ع اساس انا مش زيها ) ،، اسامة مذايكينتشو ، ارجيلة حمادة ،، حب رهف السري والفائض وشخصية وحب كل واحد فيكم
هاي اشيا ما بتغيب عن البال بالمرة ، بصحى وبنام بحلم فيكم
واحلى فريق تجوال واحلى ناس
بحب وجودي بينكم :))
_ ملك عثمان
_______________________________

 

output_lHL6Tf

المتجولون في الاردن : وادي الهيدان وراسون وام قيس وعجلون وجرش بالاضافة الى السلط.

 

 

Categories: تأملات | Leave a comment

Post navigation

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Create a free website or blog at WordPress.com.

%d bloggers like this: